سبتمبر الأحلام

فى بداية سبتمبر كنت سالته

هل سيكون على عهده معى و يمنحنى بداية رائعة ؟

والاجابة وصلت الحمد لله و قال اه

وحددنا معاد فرحى ان شاء الله فى شهر الحب

وكمان عملى مفاجاة واتنشر خبر عن كتابى " ورق ملون "

فى مجلة نصف الدنيا عدد النهاردة 

هو اه مش اول خبر يتنشر عنى ولا حاجة 

لكن الفكرة ان دى مجلة والمجلات ليها احترامها بردو (زى ما علمونا فى الكلية يعنى :D)

صورة بالالوان و ورق جلاسيه لميع وغلاف و قطاع مميز من الجمهور 

ده غير ان دى مؤسسة الأهرام وان اسمى يبقى فى اى حاجة تبع الاهرام ولو من بعيد كان حلم مستحيل
 اقوم الاقينى فى نصف الدنيا اللى كنا بنشوف اعلاناتها فى التليفزيون واحنا صغيرين
 وكأنى فى حلم ولازلت مش مستوعبة

 اما بقى الحاجة اللى كانت مخليانى صاحية من اول امبارح
 انى اخيرا بقى عندى البوم لصور خطوبتى
بعد معاناة فى تقطيع الفيديوهات اللى اساسا بايظة علشان اطلع اى لقطات حلوة
مرورا بان صاحب الاستديو قالى الصور مش هتنفع بعدين لما لقانى خلاص هنهار قدامه
قالى طيب نجرب كدا و نشوف والحمد لله الحمد لله طلعلى الصورة تحفففففففة
اتفرجت عليهم يجى عشر مرات مع انى انا اللى مقطعاهم اساسا
بس فعلا المعاناة هى اللى بتخلى اى حاجة ليها طعم مختلف وفرحة متتوصفش
وبالنسبة للفستان اللى مالوش اى صورة طلعت كاملة فـ علشان هو يستاهل
 هتصور بيه صورة مخصوص زى بتاعت احمد راغب كدا مش هظهر فيها هو بس 

ومن موقعى هذا بعد كل الحاجات الحلوة اللى حصلت فى سبتمبر 

احب اقول ان سبتمبر الاحلام بيقولكم ستستمر الاحلام ^_^