صوت الحلم

الحلم تنهيدة و صوت من القلب
وبسمة طالعة برضا بتقول يارب

..................

الحلم صوت العاشمنين فى المعجزة

مصطفى التلوانى

وطن

بالامس حلمت بك 

لم تحملنى إغفاءة إليك 

ولكن حملتنى نظراتى لعينيك الى احلام قلبك 

بالامس اهديتنى الامل 

البستنى الابيض 

وطوقت احلامى بذراعيك 

ومنحتنى نسخة منك
بالامس ادركت ان الوطن حلم يستقر داخلنا فقط 

أحلام قيد الاإنتظار

 

غفوة حلم

تتباعد الاحلام عن جفنها الذى ما عاد يقوى على النوم

اعتادت الاستيقاظ حتى فى نومها فزهدتها الاحلام

يتسارع نبضها كلما منها ذلك الطيف

فهى تخشى ان يتملكها النعاس فيقترب طيفه مع ذلك الحلم اللعين

حلم يتكرر فى الصحو مرارا لكنها تؤمن ان فى الصحو تتمكن من المقاومة

بينما فى النوم تصبح مسلوبة الارداة ويوما صادفها فى طريق لم تكن يوما لتسيره

الا ان رحمة الله دفعتها للمواجهة فادارت وجهها شامخة مبتسمة

ومنذ ذلك الحين وهى تخلد للنوم مطمئبة فحلم طيفه قد غفا الى الابد

-----------------------------

عندما وجدتهم جالسين سويا وبنظرة يملاها التعالى يطالبونها بالرحيل

فما عادوا بحاجة اليها استشاطت غضبا وقررت ان تستيقظ وتقطع ذلك الحلم

وبمنتهى البراءة سألته مش انت كل الدنيا ليا قالها اه طبعا
 قالتله انا عايزة فلوس كتير اوى

احتضنها وطلب منها النوم وفى الصباح سيمنحها كل ما تريد من المال

ومع اشراقة شمس طموحها ادركت انها تملك اهم مما لديهم

 وقررت ان يغفو حلمهم و يستيقظ فقط واقعها

------------------------------

يدفعها للأمام دائما لمستقبل تخطه يداها بإبتسامة عيناه

فنجاحها يزيد حبه لها وسعادتها هى غايته لذا تعشق نجاحاتها جواره

كما تعشق تأمل وجهه وهو نائم وعندما يستيقظ ايضا

ويوما اخبرها كم يغار من النوم واحلامه التى تداعب جفونها وهو لا يستطيع منعها

فاجابته منذ أحببتك وانا اغزل احلامى من عنيك فما لا حاجة بالنوم فانا احلم مستيقظة

------------------------------

كن مؤمن بان واقعك السئ ما هو الا حلم يمكنك الاستيقاظ منه
 بالاجتهاد والاعتماد على الله

وبان واقعك السعيد ما هو نتاج احلام يقظة يعيها العقل فينفذها

وعليك ان تقرر بين ان تغفو الاحلام كما النوم او ان تحلم مستيقظا

من كتابى الالكترونى ورق ملون 

أحلام خالية المعنى

استغربت انى حلمت بيكِ 

بس الاغرب لما اصحى من النوم الاقى ان اليوم ده عيد ميلادك 

طيب ليه ؟ انتِ كنتى قاصدة بجد الكلام اللى قولتهولى فى الحلم 

على فكرة انتِ كمان وحشتينى اوى مع انى مش عارفة ليه !!!

......................

الحلم كان أبيض وأسود مع اننا فى زمن الالوان 

بس علشان المكان كان حقيقى زيادة عن اللزوم

لفيت فى نفس الشارع مرتين 

كنت بسال نفسى انا ايه جابنى هنا 

او يمكن كنت بتأكد ان الشارع والبيوت ووشوش الناس حقيقية

انا فاكرة كل ملامح الحلم حتى انه كان من غير ناس اصلا !!!!

.........................

انا مش هقدر اعمل حاجة علشان انا مش عايزة اعمل حاجة 

 بلاش نظرات الحزن اللى بتيجى مخصوص علشان تبصهالى 

مهو انا حتى لو وجودى مؤثر مش هتصرف اى حاجة هقف اتفرج بس 

مش علشان انا بقيت نادلة ولا فقدت احساسى باللى حواليا 

علشان ده مجرد حللللللم !!!

.........................

على قدر حلمك تتسع الأرض

محمود درويش 

شخابيط ملونة

كل حاجة فى الماضى بتزعلنى 

 بجد بزعل اوى لما بفتكر او بفكر فـ حاجة عدت 

يمكن فى الاسبوع ده كنت بجاهد نفسى علشان اجيب اى حاجة مبهجة 

او فيها امل وافضل محافظة على اتفاقى مع نفسى ومعاكم فى البداية 

ان كل الحوليات هتكون مبهجة برغم اى شئ 

بس حبيت اسجل فى اخر يوم من اسبوع ده 

انه كان اسبوع  شاق جداااا عليا نفسيا وذهنيا 

والحمد لله انه خلص بسلام ويارب تكونوا استمتعتم باللى كتبته فيه 

واكون قدرت احافظ على اتفاقى 

.........................

بحفظ التواريخ المهمة فى حياتى مش بحفظها متعمدة ولا حاجة 

بس هى بتتحفظ لوحدها و بتفاصيل اليوم كمان 

ما بين التواريخ دى بقى فـ احداث كتير اووووى 

مش بحب افتكرها مع انى مش بنساها ابدا 

انا بطبعى شخصية متناقضة مش جت على دى يعنى :)

..........................

كلمة فاكر/ة بتفكرك بإيه ويمين ؟
انا كلمة فاكر/ة بتفكرنى على طول بقصيدة حواديت قديمة لـ أحمد حداد
تقوله فاكر يرد فاكرة
ورق التذاكر ... ورق المذاكرة
كل الاغانى يعيدوها تانى
وهو فاكر وهى فاكرة
جربت تربط كلمة بذكرى حلوة او غنوة مبهجة او حتى شخص يضحكك
لو لسه مجرتش اوعى تضيع الفرصة دى وجرب

................................

أغمرنى بحنان و تناول بعض دقات القلب المرهقة بفعل الذاكرة
 وأخبرنى من احببت قبل ان تلقانى
ومن هنا لا تعنى اسمائهن ولكنها تستنكر ان تكون حقا فعلت

أسالنى عن حبيبى السابق وليكن سؤالك قاسى بحجم خذلانه

تجاوز معى بحور الحب السبع
 و احكى لى قصة حب حدثت منذ زمن بعيد كان بطلاها نحن

................................

بحبكم فـ الله

حبايب روحى

اكتر شخصيتين كان نفسى اقابلهم 

مصطفى محمود 

زمان وانا بتفرج على برنامج العلم والايمان كان نفسى اوى اتكلم معاه

واقعد اساله الاسئلة الرخمة بتاعت الاطفال 

و كان جوايا يقين انى لو سالته اى سؤال هيجاوب عليا بصدر رحب وبمنتهى السهولة 

كان هو السبب انى احب دينى بزيادة وانى اعتمد فى قربى لربنى على روحى 

الروح هى اللى هتقودك لله وللخير والجمال والحب 

فى اى حاجة بتحصلى كنت بفتكره إن بداية كل شئ  هى بالتأمل واعمال العقل 

وينتهى بالتسبيح و الاجلال لعظمة الله 

محمد متولى الشعرواى 

مش بعرف اتكلم عنه خالص بس بحبه جدا 

و الحمد لله شفته مرتين فى رؤية  

نصحنى فى حاجتين كانوا مهمين اوى فى حياتى والحمد لله حصلوا 

صوته بيطمنى وبيقوينى وكتبه مرجع مهم جدا بالنسبالى 

وهسيبكم بقى مع دعاء ركبت فيه اجزاء من ادعية للشيخ الشعراوى
مع اجزاء من كتاب " أناشيد الاثم والبراءة " لدكتور مصطفى محمود
ونشرته على مدونتى شئ سيبقى بيننا بتاريخ 25/11/2010

رب لا أشكو و لكن أرجو
أرجو رحمتك التي وسعت كل شيء أن تسعني
أنت الذي وسع كرسيك السماوات و الأرض
أنت الفاعل سبحانك و أنت مجري الأقدار و الأحكام
و أنت الذي امتحنت و قويت و أضعفت و سترت و كشفت 
و ما أنا إلا السلب و العدم .. و كل توفيق لي كان منك و كل هداية لي كانت بفضلك
و كل نور كان من نورك .. ما أنا إلا العين و المحل 
و كل ما جرى علي من استحقاقي و كل ما أظهرت فيّ كان بعدلك و رحمتك
ما كان لي من الأمر شيء 
و هل لنا من الأمر شيء !؟ 
أنت أنت وحدك 
و ما أرتضي مشوار هذه الدنيا إلا لدلالة هذا المشوار عليك 
و ما يبهرني الجمال إلا لصدوره عنك و ما أقصد الخير و لا العدل و الحرية و لا الحق
إلا لأنها تجليات و أحكام أسمائك الحسنى يامن تسميت بأنك الحق
فحسبي النية و المبادرة فذلك جهد الفقير .. فليس أفقر مني .. 
زادي منك و قوتي منك و رؤيتي منك و نوري منك
و لا سر إلا سرك و إن تعددت الأسماء و تنوعت المفاتن و اختلفت الوجوه
إنما هو أنت وحدك المحبوب أينما توجه قلب محب
و أنت وحدك المعبود أينما توجهت نظرات عابد
و أنت وحدك الرزاق و إن تعددت الأيدي التي تعطي
إنما تستمد جميع المصابيح نورها من نورك
كل مصباح يأخذ منك على حسب استعداده و يعطي من نورك على حسب شفافيته
و لكن العطاء في الأصل منك و الجمال منك و النور منك
لا إله إلا الله حقاً و صدقاً
و ذاتك هي واحدة الحسن 
الحسن كله منها 
و الحب كله لها 
و يدك هي المشيئة
الفعل كله منها و القوة كلها بها 
و إن تعددت الأيدي في الظاهر و ظن الظانون تعدد المشيئات
و إن تعدد المحبون و تعددت المحبوبات
سبحانك لا شريك لك
سبحانك و الحمد لك
سبحانك والحب لك

ماض لم يغيب

لازلت اهوى عد النجوم فى الليالى الصيفية المقمرة 

وتتبع القمر وحركة السحاب كلما حملنى الطريق 

لا اذكر ان شئ بى تغير

 لازلت انا الطفلة التى ترقض على سلالم المنزل 

و تغنى بصوت عالِ 

وعندما تفكر فى ذاتها تنزوى لتبكى كثيرا 

..............

لشدة عشقى للراديو والشعر كنت اسجل القصائد المغناه 

و اظل بالايام اسمعها كى احفظ كلامتها واللحن كذلك

لا اعلم اين اختفت تلك الشرائط

لكننى اذكر كل القصائد اللى حفظتها و بترتيب تسجيلها !!

................

ما من ماضى أحن إليه فقد تناسيت كل ما مضى 

و أصبحت اعتنى بحاضرى جيدا 

حتى أحن اليه بفخر فى المستقبل 

................

تذكروا فقط المبهج من ماضيكم 

فالحنين الى الفرح يصنع المستقبل السعيد 

مصر زمان

أبيض وأسود

الافكار المسيطرة على ذهنى ان الزمن القادم من الخلف 

لم يتلون مطلقا ولكنه اكتفى بالابيض والاسود 

فـ هل كان صادق الى هذا الحد ؟

.....................

صندوق ذكرياتى يحتوى على تفاصيل دقيقة 

 ورقات مطوية اُنتزعت من منتصف كراسات العربى 

وتحتوى فقط على إسمى  ...

 احتفظت كل واحدة منا بخطوط طفولية لأسمها 

مازلت اذكر صاحبة كل خط ... هل ما زالت الورقات تذكركن بى 

ام انها لم تصمد امام فعل الوقت بها ؟؟

...................

وحدهن الجميلات يمتلكن قلب أبيض و ذاكرة سوداء

لا تنزعج ...

 فالجمال الذى أقصد هو القلب الذى تحمل كل ما مضى 

وظل على نقاؤه 

..................

سر تعلقنا بالماضى هو ذاته سر تعلقنا بالأمل 

فقد اكتسبت قلوبنا ذلك باليقين 

فالقمر يبدد ظلمة السماء 

شهرزاد بعد الالف ليلة

بلغنى ايه الملك السعيد ذو الرأى الرشيد

أن الاوان قد آن لنعود الى مملكة شهران

عبر بحار الماضى العميقة فلتغفو يا مولاى لدقيقة ....

يحكى ان الاميرة قد بلغ بها الجمال مبلغ الحور الحسان

وطمع كل الملوك والامراء فى الفوز بقلبها

ولكن الاميرة لازالت تنتظر الشاطر حسن حتى يعود من رحلته الطويلة

ليحملها على حصانه الأبيض و يعبر بها  البحار والازمان ويغمرها بالحب والحنان

وفى ليلة مقمرة تشبه وجهك بالتمام تلاقت عيناها " بك "

وبدأت الاساطير تتوالى على ذهنها لتأسر قلبك و تتورط فى عشقها 

فكانت مجمل الاساطير ما هى الا جزء اسطورتى معك 

وبعد الخمسون عاما التى انقضت اليوم كان على ان اعيدك الى حيث البداية 

فلم اشعر مطلقا بالليالى ولم يعنينى صياح الديكة فكلما غفوت انا استمتعت بإستسلامك انا 

وقد كان العمر جوارك اروع رحلة اسطورية أسرت بجمالها القلوب الالباب 

عالق بالروح

سورة

آية 

دعاء

لو ده جنان اتجنن

لو ده جنان اتجنن 

صفى كل حساباتك القديمة مع الدنيا 

(1)

جيب ورقة وقلم واكتب اسماء كل الناس اللى ضايقتك فى حياتك 

وبعدين صلى ركعتين لله وأنوى انك هتسامحهم 

وبعد ما تسلم ادعى ربنا انه يثبت قلبك 

شوف ايه الوسيلة اللى ينفع تبعتلهم بيها رسالة محتواها 

" انا مسامحك ابتغاء مرضات الله "

(2)

جيب ورقة وقلم واقسم الصفحة نصيين واكتب على اليمين 1 والشمال 2 

فى النص الاول اكتب اكتر موقف زعلك فى حياتك 

وفى النص التانى اكتب اكتر موقف فرحك 

وبعدين طلع العلاقة بين الموقفين و اكتب التاثير الايجابى لكل واحد فيهم 

وكل ما تحس إيمانك قل أعمل مقارنة 

......................

لو ده جنان اتجنن 

وخلى حد متعرفوش يأخد حسنات 

(1)

اطلب من حد متعرفوش انه يدعيلك بظهر الغيب 

 وقوله انا حاسس ان ربنا بيحبك و هيقبلك دعوتك ليا 

(2)

اسال حد متعرفوش عن معنى آية معينة فى القرآن 

وخليه يفكر معاك ويتدبر فى المعنى 

....................

لو ده جنان اتجنن 

وقرب لربنا بكل حواسك 

(1)

سبح على صوابعك وبلاش تستخدم اى وسيلة تانية للتسبيح 

لسانك هيتعود على الذكر و حركة صوابعك هتفكرك بالتسبيح 

لو نسيت شوية هما هيفكروك 

(2)

وانت بتقرأ قرآن ركز فى الايات وشكل الكلمات واقرا بصوت مسموع 

عنيك هتحفظ الايات و لسانك هيستمتع بحلاوة التلاوة 

واول ما هتسمع القرآن عقلك هيسترجع اللى قرأته قدام عنيك وبلسانك 

إبتهالات

انا عاشقة للابتهالات وصوت النقشبندى و نصر الدين طوبار 

و الابتهالات حاجة كدا تخليك عايش فى دنيا تانية خاااالص 

بتنقلنى لجو الحضرة اللى نفسى احضره بس اعتقد ده للولاد بس 

يمكن انا بقالى فترة طويلة مش مهتمه اسمع اغانى ولان دايما اذاعة القرآن مفتوحة 

فالابتهالات بقت هى اللى بفتكرها اكتر فى الفترة دى 

هقولكم الاول بعض الابتهالات اللى بحبها جدا لـ نصر الدين طوبار 

رمضان أشرق فالدنى تتطلع ظمئى لنور من كتابك يسطع 

ايقظت قلبى فاستفاق ميمما شطرات الهدى يرنو اليك و يسمع 

سأقوم ليلك داعيا متبتلا واظل يومك خاشعا اتضرع 

اول ما بسمع الابتهال ده يبقى رمضان جه خلاص مش جه فى التوقيت 

لا جه فى الاحساس والحالة بكون حاسه انى شايفه الهلال خلاص 

وان اجواء رمضان الروحانية ابتدت فعلا 

جل المنادى ينادى يا عبادى انا ماحى الذنوب والاوزار 

إلهى بنورك اهتدينا وبفضلك استعنا و بك اصبحنا وامسينا 

من الابتهالات القوية جدااااا واللى بتاثر فيا اوى 

بك استجير فمن يجير سواك 

فأجر ضعيف يحتمى بحماك

ربنا يحبك

لما ربنا بياخد منك حاجة بتحبها اوى 

فده علشان يختبر قلبك انت بتحب الحاجة دى اكتر 

ولا بتحب ربنا اكتر علشان بعتهالك 

لو بتحب الحاجة اللى اخدها منك حزنك عليها هيشغلك عنه

انما لو بتحبه اكتر هتجرى على سجادتك و تبكى بين ايديه وتقوله يارب محتاجلك

عارف زى ما ربنا بيمتحن ايمانك وصبرك كمان بيطبطب عليك 

بيبعتلك ناس حلوين اوى وقت ما تكون مضايق علشان يسعدوا قلبك 

و يجيب فى بالك آية او حديث يهون حزنك ويصبرك 

وبعدين لما تنجح فى الامتحان بيكافأك مرتين

مرة فى الدنيا بتعويض عن الحاجة اللى خسرتها 

ومرة فى الآخرة بثواب عن صبرك 

شفت قد ايه ربنا بيحبك

حُرية الحواس

هو يعنى ايه روحانيات 

يعنى الحاجات اللى بتلمس روحك وتخلي كل حواسك فى وضع استمتاع وحرية

عارف يعنى ايه حواسك حرة 

يعنى عنيك تدمع فجأة او لسانك يردد آية لوحده او قلبك يتنفض من الخشوع 

وايديك بشكل تلقائى تسبح و مراكز الاحساس فى روحك فى حالة استرخاء تام

جربت الحرية دى فى الصلاة 

لما تصلى ركعتين لله - شكر او حاجة - فتحس انك عايز تطول فى السجود 

وتلاقى عنيك سجدت بالدموع معاك فتحس براحة استعمرت روحك

طيب جربت الحرية فى الصوم 

لما توصل لدرجة انك بتحس بالارتواء لما تقرا القرآن 

وتحس ان ذهنك طول الوقت بيسبح حتى وانت بتعمل حاجات تانية كتير 

وتلاقى انك نشيط بزيادة وكل اعراض الصيام اللى الناس حاسة بيها مش وصلاك انت 

فتحس بسعادة ان صيامك حُر

الاكيد انك جربت حرية التقرب لله 

لما تيجى قدام عنيك صورة الكعبة وتلاقى لسانك بيقول يااااارب اكتبهالى 

وتلاقى عنيك بتلمع بالدموع لما تسمع بالصدفة آية معينة 

ولما حد يدعيلك دعوة بتحبها فتحس ان عقلك متيقن انها فى مرة هتصادف ساعة الاجابة

وصل حواسك للحرية
هتحس قد ايه العبادة نعمة كبيرة اووووى

الفكرة

الفكرة فى الابتلاء مش إنك تتحمل 

الفكرة انك ترضى وتصبر وتتعلم 

ربنا مش بيبتليك علشان بس يختبرك 

ربنا عايز يقويك على الدنيا ويعلمك تتحداها أكتر

ويوصلك انه بيحبك علشان تقربله أكتر 

-----------------

الفكرة فى الصلاة مش بس طاعة 

الفكرة انك تستقيم فى حياتك بإلتزامك لمواعيدك 

و بإحتشامك فى لبسك وبطهارة حواسك 

وبالتركيز فى تصرفاتك

و تدريب عينيك على الخضوع وقلبك على الخشوع 

فكر تانى هتلاقى ان صلاتك إستقامة لحياتك 

--------------------

الفكرة فى الدعاء مش فـ الاجابة 

الفكرة فى إنك مؤمن بأن الله قريب 

مدرك بأنه سميع متيقن بأنه قادر 

تثق بأنه عليم فلا تشغلك الاجابة قدر أن تشملك رحمته 

---------------------

الفكرة فى رمضان مش بس الصيام

الفكرة فى الوحدة و إننا واحد قدام ربنا 

ان الاحسن هو اللى بيقرب لربنا اكتر مش اى حاجة تانية 

كلنا بنبدأ سوا ونفطر سوا بس مين بيسبق لربنا 

............................

الفكرة فى الخير مش التبرعات 

الفكرة فى الاحساس بالغير سواء كانوا بعيد او جنبك على طول 

إنك تحس بفضل ربنا عليهذك فتساعد اللى محتاج و سيبك من الاعلانات 

أعمل الخير اللى تحسه مش اللى يوجهوك ليه 

الخير مش بس تبرعات الخير أشكال كتير اوى قلبك هيحس بيها 

-------------------------

الفكرة فى أنك تحتاج من حد يدعيلك 

مش بس انك محتاج دعوة بظهر الغيب 

الفكرة انك عايزها دعوة خالصة لوجه الله مفيش فيها رياء 

دعوة من ناس كتير فى اوقات مختلفة علها تستجاب 

" اللهم إقضى حاجتى وفرج كربتى يا أرحم الراحمين "

من كتابى الإلكترونى " ورق ملون "

يا الله

الحمد لله الذي فضلنا
على كثير من عباده المؤمنين

اللهم اني اعوذ بك من علم لا ينفع
ومن قلب لا يخشع
ومن نفس لا تشبع
ومن دعوة لا يستجاب لها..

اللهم يا مصوب خطأ الدعاء
بألا تجيب
ولذلك تحمي من الضر
من يدعو بالشر دعاءه بالخير.

سبحانك
- ولا تقال الا لك-
حذرتنا ألا نحكم في ما لا نعلم
حتى لا نحكم الأهواء في تزيين ما نشاء

وحسبنا من قولك عسى أن تحبوا
وعسى أن تكرهوا
ما أيده الواقع من شر
فيما نحب ومن خير فيما نكره.

اللهم انى اسالك  باسمك الرحمن الرحيم
 أن تنقذني من عيني فلا تريني الأشياء إلا بعينك أنت
و تنقذني من يدي فلا تأخذني بيدي بل بيدك أنت
تجمعني بها على من أحب عند موقع رضاك

فى الصورة

كن ذلك الطفل المبتسم فى اقصى اليمين 

لا يظهر منه سوا رمز الانتصار 

قد يكون قدره ان يظل خارج الكادر 

الا انه حاول ان يصل اليك بأى شكل ممكن 

تخيل الصورة بدونه ستجد ان الصورة تفتقد الترميز 

شئ ما يجعله يجسد الصورة بكافة جوانبها 

يجسد محاولاتنا المضنية فى الوصول 

وان كان الوصول فى حد ذاته رمز الانتصار 

وابتسامة رضا يحتفظ بها القلب 

حديث البحر

سنوات تمر وكل يوم يتصارع الموج بداخلى و يعلو أكثر
يبتهج فيتدافع ليرتطم بالصخور محدثا ثورة عارمة من البياض
و يحزن فينكمش ألماً فى زرقة رمادية
أخفى داخلى الكثير من الاصداف و الأسرار
لا شئ يذهب هباء كما يظنون
فقد صرت أحفظ ملامحهم وحكااياهم التى ما انا وقفوا امامى تذكرتها جميعا
وكأنها حبل موصول بين أذهانهم وبينى
ينشرون عليه ما يفيض بيه القلب من اسرار
ورغم وصفهم لى بالغدر احيانا الا انى الوحيد الذى لا يتغير مهما تلونت الوجوه امامه
فلم يعد يثير دهشتى ذلك الصبى الذى لتوه أكمل العشرين
وهو يسرد لى قصة صديقه الذى استشهد بالامس القريب وكانه شيخ على مشارف السبعين
فأبتهج أكثر و اندفع تجاههم معبرا عن مدى سعادتى بوفائهم
الذى لم أعد اصادفه كثيرا منذ أمد

زهايمر

وحشتينى 

فجيت افكرك بيا 

بـ حب الجامعة والكورنيش 

وضحكة صافية من قلبك و لمسة ايد

ومشى ساعات فى عز الحر والزحمة 

وذرة مشوى عمر فى مرة ما اكلناه 

وكل ما اقولك نفسك ايه 

تقولى " بس ابقى معاك "

وفاكرة الدبلتين واللمة و الزغايط 

و صورة مبينه ضحكة شفايفك بس 

علشان كنا بنتوشوش فكان وشى دايب فيكى 

وقلت حبيبتى انا اسف نعيد اللقطة من تانى 

فرديتى بفرحة باينة فى عنيكى 

دى اول مرة صورة تبقى حقيقية 

ملامحى دايبة فى ملامحك 

وضحكة قلبى معكوسة فى ضى عنيك 

طب فاكرة اول حمل ليكى 

ووشك المرهق بيضحك لما يومها اختارنا اسمه 

كنت بزعل كل ما اسمع آهه منك 

وبعد ما تنامى اعاتبه ليه يضايقك 

وافضل أتامل ملامحك 

بس عارفة كل يوم بيعدى بيخليكى أحلى 

فاكرة خناقتنا العبيطة 

كنتى اول ما تلاقينى خلاص بزعق تزعلى
وبمنتهى البراءة تسألى " أنت بتزعقلى أنا "

فاسكت و اسيب البيت وانزل
وافضل أضحك طفلة و مجنونة كمان
بس هعمل ايه بحبك 

وبعد ساعة ارجع أصالحك بشكولاته و هريسة

وحتى لو مش قادرة تفتكرى
كفايا انى ضحكتك
انا اصلا بحبك حلم على قدى 

سنين عشناه 

ولسه يا عمرى بحلم بيه 

................................

رمضانكم مغفرة
كل سنة وانتم طيبين

براح

البراح يا صغيرتاى هو ضمة

هو تلك الراحة بين راحتيكما

و ابتسامة تلمع بيها الاعين

تضفى على الكون حنان لا حدود له رغم قسوة كل شئ 

أشعر اليوم ان الأرض تبتسم لثباتنا بها 

وان فجر المستقبل القادم من الخلف يعانقنا كما تعانق إحدانا الأخرى

فلتعانقانى أكثر

إنعكاس القلب

الدموع يا صديقى هى انعكاس  لا أكثر 

تنقى حدقة العين لتمنحك رؤية أكثر وضوحا 

وتبرز ما حواه قلبك 

دوائر الفرح ووهج الطموح المضئ و سلام داخلى ولابأس ببعض اليأس اليابس 

و من بعيد تتجلى الاحزان بإرتفاعاتها الواضحة 

ووحدك تحدد اى حنايا القلب اثارة لمركز الابصار اولا 

لذا عليك ان تدرب دمعك على الانعكاسات المبهجة 

حسنا .. اغمض عيناك و تذكر رحمة الله وكرمه معك مرارا 

افتحهما الان ستجد عيناك تتبع سلامك الداخلى وهو يتجه نحو وهج الطموح 

كررها مرة أخرى 

اغمض عيناك و و تأمل إرادة الله فى كل شئ وكيف انه أكد 

" إن مع العسر يسر " 

افتحهما الان ستجد ان عيناك و سلامك الداخلى مقتربان تماما من دوائر الفرح 

لا عليك باليابس فرحمة الله بك ان جعلك بداخل الأمور حتى تكن على مقربة دائمه منه 

اذا اصابتك ارتفاعات الاحزان تبكى بين يديه فيدفعتك الى دوائر الفرح 

واذا استشعرت اليأس حولك دعوته فيتجلى لك وهج الطموح 

هلا أخبرتنى الآن اى حنايا القلب اثارة مركز ابصارك اولا ؟ 

طاقة نور

ما من نهاية
فبمجرد عبور قطار الألم مرفأ القلب
تتجدد لدينا الرغبة فى السعادة 

الاحزان وحدها من يحفز طاقة النور بداخلنا

ثم إيه

ثم هو ثم حلمه ثم انه كان كبير
بيرسم الاحلام سراب
ويشترى الضحكة بكتير
ثم هو حد عادى
ثم حد حدود بيأسه
ثم ايه
ثم قلبه طفل لسه
 ثم وبنظرة بريئة شاف طموحه
فيلم كارتون ماللى ممتع
وسط كراكيب الزمن
ثم ايه
ثم صدق قلبه فى محاولة وخلاص
ثم حاول واجتهد
ثم حصلت المفأجاة
حقق القلب الصغير الف حلم كان كبير
ثم توته بدأت حكايته
ثم الف حد شاركه
ثم دى حكاية الأمل

كل ما أريده

(1)
أريد حلما لا ينتهى
و صحوا يستمتع بما يحدث و فقط

(2)
أريد كتابا لا يشمل حد معين من الصفحات
ولكنه يحوى جميع ما اريد ان اكتبه ولا استطيع

(3)
أريد للزمن ان يتوقف عند لحظاتى السعيدة أكثر
و لا يدعها تمر إلا عند لحظات سعادة أخرى

(4)
أريد ان تخوننى الذاكرة كثيرا فتمحوا من عقلى تلك الاحداث السيئة
وتدعنى استمتع أكثر بكل ما منحنى الله إياه بعد ذلك

(5)
أريد عصفورا يغرد بإسمى كل صباح
 و دفترا يمتلئ بأسماء من أحب و ما قالوه عنى

(6)
أريد لأماكنى المفضلة ان تجتمع فى نطاق واحد
حتى ازورها جميعا فى اللحظة ذاتها

(7)
أريد أن أجمع الكثير من الهدايا و لتكن أولاها دعوة بظهر الغيب
و أخراها كذلك

(8)
أريد حياة سهلة للغاية لا تشمل شئ سوا أنت و سجادة صلاة
لأتقرب الى الله بكما

أنا فى الأصل

 أنا فى الاصل حدوته
ومكتوبه بخط إيديك

ابان فى الصورة مهزوزه 

علشان مكسوفة

يبان فى عنيا شوق لعنيك 

وانا أصلى فيونكه رقيقة 

معقوده بحبها ليك 

بلون الورد تتزين علشان ترضيك

وانا أنت 

وانت أمانى للفرحة 

طريق بمشيه 

من الاحلام لصبح حقيقة ورديه 

و ايدى مشبكه فى إديك

وواقع الامر انى بردو أسطورة 

خيال وطموح و واخده من الجنان حبه 

بيطلع كله بس عليك

وليك بدلت قلبى يكون سماء صافية
و كتبتك على السحاب دعوة
يارب أكون أم لأولادك وزوجة تقر بيها عنيك 

التحرير

هو : انا رايح التحرير 

انا : بجد ..... امتى ..... دلوقتى ..... يا بختك

هو : براحة طيب مش عايزة حاجة من هناك 

انا : هو انا عايزة بس ده انا نفسى 

هو : كشرى طبعا 

انا : يعنى انت بتغيظنى ماشى بس اما اشوفك

وبعد ربع ساعه 

هو : انا فى التحرير قدام المحل وهدخل اهو

انا : جيبلى طيب وتاكله بدالى 

هو : على فكرة المحل مش اسمه كشرى التحرير اسمه حاجة تانية

انا : اه ما انا عارفة اسمه ......... ده انا ممكن اوصفهولك بالتفصيل 

هو : للدرجة دى ههههههههه

انا : واكتر كمان ده انا تقريبا حافظة تفاصيل التحرير بالسم

..............................

بحب التحرير من زماااان جدا وكل شوية حبى ليه بيزيد اكتر واكتر
من اول معلقة كشرى هناك لحد الولد اللى بيلعب جيتار ووصولنا لزحمة العربيات
وبقيت بتجنن وانا بشوفه فى التليفزيون دلوقتى من روعة المتظاهرين
نفسى اروح هناك تانى والف الميدان واكل كشرى و اهتف مع المتظاهرين
ورغم انى مش هقدر اعمل كدا فى الوقت الحالى ولسه فى وقت على ما اقدر اروح
بتمنى لما اروح تبقى مصر استقرت والتحرير يبقى مليان بالولاد اللى بيلعبوا مزيكا
و الجناين تبقى مليانه ورد و الزحمة تبقى منظمة والسماء تبقى فرحانة

...............................

اذا كان الناس يفضلون فى بعض الاوقات تذكر الايام الجميلة فى الماضى 

فان الايام القاسية يصبح لها جمال من نوع خاص حتى الصعوبات التى عاشوها تتحول فى الذاكرة

الى بطولة غامضة ولا يصدقون انهم احتملوا ذلك كله واستمروا بعد ذلك 

لــ عبدالرحمن منيف

ضحكة مصر

ضحكة مصر
هتحس بيها فى الشوارع هتحس ان الهواء بيحضنك وان الجو فرحان 

جربت تبص فى وشوش الناس كل يوم وتلاقي الغيوم مسيطرة عليها ده طبعا العادى بتاع كل يوم 

بس جرب تبصلها تانى اليومين دول هتلاقيها اتغيرت فى حالة من السماحة على الوشوش 

اصل لما كلنا بنقول فى وقت واحد " مــصــر " حاجات كتير اوى بتتغير 

ضحكة مصر
هتشوفها فى وشوش الاطفال اللى بقت بتحب تحية العلم أكتر من لعب الكورة
هتشوفها فى كلامهم عن أحلامهم اللى آخر كلمة فيها علشان مصر
هتحس بيها اول لما تلاقى الاطفال مصممين ينزلوا المظاهرات 

هتلاقيهم بيهتفوا بصوت يهز قلبك و بيغنوا لمصر أغانى الثورة اللى حفظوها صم

ولو قربت من المشهد أكتر ممكن يوصفولك احسن من اى محلل سياسى احنا عاملين ثورة ليه بأبسط الكلمات 

اللى هتخليك لا إراديا تدمع و تحس قد ايه كنا لازم نمر بالظروف دى علشان بس 

نشوف فـ عيونهم ضحكة مصر 

ضحكة مصر 

هى الحالة اللى نفسنا تفضل على طول 

وعلى قد ما مصر غالية على قد ما التحدى بيكون أصعب 

أبكى أنزف أمووووت و تعيشى يا ضحكة مصر 

وتعيش يا نيل يا طيب وتعيش يا نسيم العصر 

وتعيش يا قمر المغرب و تعيش يا شجر التوت 

وتعيشى يا ضحكة مصر

بداية البدايات

بداية ...

هنا حيث التجمعات الفردية 

حوليات 

بداية ...

ما من خطط مضمونة ولكنها مغامرة الثبات 

فهل سأستطيع لا أعلم ولكنى سأحاول وهذا يكفى 

بداية ...

وحدنا نملك تحديد ما ننوى المغامرة به وكيف تكون البداية 

وكانت المغامرة تدوينية و البداية ما هى الا قرار 

بداية ...

قررت أن تكن حولياتى مبهجة مهما يحدث لاحقا 

وهو التحدى الأكبر لذاتى 

بداية ...
أسعد الله أوقاتكم و جعل مبتدأ كل منكم سعادة لا تنتهى :)