Elegant Rose

الأربعاء، 3 يوليو 2013

التحرير





هو : انا رايح التحرير 
انا : بجد ..... امتى ..... دلوقتى ..... يا بختك
هو : براحة طيب مش عايزة حاجة من هناك 
انا : هو انا عايزة بس ده انا نفسى 
هو : كشرى طبعا 
انا : يعنى انت بتغيظنى ماشى بس اما اشوفك
وبعد ربع ساعه 
هو : انا فى التحرير قدام المحل وهدخل اهو
انا : جيبلى طيب وتاكله بدالى 
هو : على فكرة المحل مش اسمه كشرى التحرير اسمه حاجة تانية
انا : اه ما انا عارفة اسمه ......... ده انا ممكن اوصفهولك بالتفصيل 
هو : للدرجة دى ههههههههه
انا : واكتر كمان ده انا تقريبا حافظة تفاصيل التحرير بالسم

..............................

بحب التحرير من زماااان جدا وكل شوية حبى ليه بيزيد اكتر واكتر
من اول معلقة كشرى هناك لحد الولد اللى بيلعب جيتار ووصولنا لزحمة العربيات
وبقيت بتجنن وانا بشوفه فى التليفزيون دلوقتى من روعة المتظاهرين
نفسى اروح هناك تانى والف الميدان واكل كشرى و اهتف مع المتظاهرين
ورغم انى مش هقدر اعمل كدا فى الوقت الحالى ولسه فى وقت على ما اقدر اروح
بتمنى لما اروح تبقى مصر استقرت والتحرير يبقى مليان بالولاد اللى بيلعبوا مزيكا
و الجناين تبقى مليانه ورد و الزحمة تبقى منظمة والسماء تبقى فرحانة

...............................

اذا كان الناس يفضلون فى بعض الاوقات تذكر الايام الجميلة فى الماضى 
فان الايام القاسية يصبح لها جمال من نوع خاص حتى الصعوبات التى عاشوها تتحول فى الذاكرة
الى بطولة غامضة ولا يصدقون انهم احتملوا ذلك كله واستمروا بعد ذلك 
لــ عبدالرحمن منيف



14 التعليقات :

Sara يقول...

حظك مع التحرير وحش زيي برضو :)

أتمنى برضو أقدر أروح هناك يومـًا ما لأنه تتويج لأي عمل ثوري وإن كنت أرى دوري في المنصورة أهم للتشجيع على الثورة :)

النهارده آخر يوم يا آية

من حقنا نفرح بقه :)

وان شاء الله نروح مع بعض قريب ونحتفل بقيام مصر فعلاً على رجليها :)

richardCatheart يقول...

هيييييييييييييييييييييح اللللللللللللللللللللللله يارب تروحى التحرير قريب اوى اقرب مما تتصورى يارب

Amira Ahmed يقول...

ياااااااااااااااااارب تعب كل الشباب دول مش يروح هدر
وان شاء الله مصر ترجع زى الاول واحسن من غير غدر وضرب تحت الحزام
منظهرهم بجد بهر العالم كله
ياااااااااااااااااااااااارب

Dina يقول...

للنحرير ذكريات رائعة مليئة بالشجن و الدموع و فرحة النصر و الكرامة ..

وجع البنفسج يقول...

في عام 2004 بالليل تقريبا حوالي الساعة الثانية فجرا يعني مش فاكرة بالضبط .. بس كان الوقت متأخر .. وكنا بنتمشى أنا والبنات صحباتي وفجأة تعبنا من كثر اللف وقلنا نقعد .. طيب نقعد فين .. ؟؟ فين ؟؟ مفيش غير صينية بها عشب أخضر .. عرفت فيما بعد أنه الصينية دي هي ميدان التحرير .. استمتعت أنا وصحباتي بالقعدة وقعدنا نقول نكت ونمنا ع العشب .. ياااااااه لما كتبت كلماتك دي افتكرت تلك الذكريات .. يا ترى راح اقدر ارجع ثاني والف في التحرير .. يارب يكون في وقت فيه البلد تصلح وضعها ..

والله يا آية .. أنا نفسي اشارك معاكم .. لكن للأسف مينفعش ..

اللي ينفع انه الواحد يدعي لمصر ولأهلها .. ربنا معاكم .. وقلوبنا معاكم ..

re7ab.sale7 يقول...

التحرير ده له مليون حكاية وحكاية لكل واحد فينا
حلوة حكايتك

Aya Mohamed يقول...

سارة

يااارب نروح قريب يا سارة
ومبروك علينا كلنا الحمد لله
ربنا يكملها على خير يارب

Aya Mohamed يقول...

مارو

اللهم آمين يااااارب
ربنا يسمع منك :)

Aya Mohamed يقول...

أميرة

الحمد لله على اللى وصلناله
ودايما يارب متجمعين ونبهر العالم فى التقدم بقى
هى دى الخطوة الحقيقية

Aya Mohamed يقول...

دينا

التحرير بقى رمز الفرحة كمان
ربنا يديمها علينا يارب

Aya Mohamed يقول...

امتياز

انا مبسوطة انك حكيتى ذكرياتك كمان
وان شاء الله قريب نتقابل ونروح التحرير
وأعزمك على كشرى كمان :)

Aya Mohamed يقول...

رحاب

انتى احلى يا حبيبتى :*

Hanan w Haneen يقول...

طب اعملوا حسابي معاكوا فى علبة كشري :-D

Aya Mohamed يقول...

حنان

اكيد يا حنون :*

إرسال تعليق

You can replace this text by going to "Layout" and then "Page Elements" section. Edit " About "